Bagong Bihis

It's been a while! It's been a long...long...long while! ^_^

 Ang bilis magdaan ng bawat araw. Laos ka kung hindi mo ito namamalayan. Maraming nagbago, maraming bago at marami pa ang pagbabagong darating.

 Inspirasyon.

 Ito ang nagbigay sa akin ng daan upang magsimulang mag-blog. Inspirasyon mula sa mga bloggers na una kong nabasa. At sa isang tao na maituturing na nagsilbing inspirasyon. Tumigil man sa pagsulat sa blog ang ilan sa mga hinahangan kong bloggers at naglaho na rin ang siyang naging inspirasyon noong una. Itinuloy ko pa rin ang pagba-blog. Dahil na rin sa hilig. Sa hilig kong sumulat. Sayang naman kasi ang mga butil ng kaalaman na natutunan ko ng minsang maging bahagi ako ng journalism class at school newspaper noong Elementary at High School. Ako pa naman iyong tipo ng tao na kung hindi maibulalas ng aking mga labi ay hinahayaan ko na ang mga titik ang siyang magsambit.

 Hindi dahil sa wala akong magawa kaya muling tumipa ang mga daliri ko sa keyboard ng computer at nagsimulang bumuo ng salita at ideya, bagkus dumating sa punto na mayroon sa akin na hindi dapat sayangin. Mayroon akong mga hilig na dapat linangin. Mayroong mga pangarap na nais matupad. At may samu't saring damdamin na kailangang isiwalat.

 Gaya ng mga karakter na nahimbing sa mahabang panahon, muli ako'y gumising. Wala mang mahiwagang halik o sumpang binali. Nguni t dahil sa mga inspirasyon at nag-aalab na naisin ay muling bumangon..at muli ay magsasalaysay.